# အဒိန္နာဒါန #

အဒိန္နာဒါန၊
သူများပစ္စည်းယူတယ်။ ခိုးတယ်ဆိုတာ အမျိုးမျိုးရှိတယ်။ ကြည့် ... ဈေးရောင်းဈေးဝယ်လုပ်တဲ့အခါ အစစ်နဲ့အတုနဲ့ ရောရောင်းတာမျိုးတို့၊
ဟုတ်ကဲ့လား။ ကိုယ်ကြိုက်တဲ့ ဈေးပြောရောင်းတာတော့ ရပါတယ်။
အတုတော့ မရောင်းရဘူး။

မြန်မာပြည်မှာ သောက်ဆေးတွေ အတုရောင်းတယ်ဆိုတာ ကြားရတယ်။ ဆေးအတုရောင်းတာတွေ သိပ်ကြောက်စရာကောင်းတယ်။
အဲဒီလိုလုပ်တာမျိုးတွေဟာ ခိုးတဲ့အထဲမှာပါတယ်။
ဈေးကတော့ ကိုယ်ကြိုက်တဲ့ဈေး ပြောရောင်းလို့ရတယ်။
သို့သော် ငါးရာတန်ပစ္စည်းကို တစ်သောင်းပေးဝယ်ထားရတယ်
လို့တော့ လိမ်မပြောနဲ့ပေါ့။

ဘယ်လောက်ပေးရတယ်မပြောနဲ့။
ကိုယ်ရောင်းနိုင်တာက ဒါပဲ ရောင်းနိုင်တယ်။
ဒါပဲပြောပေါ့။ သို့သော် အတုကို အစစ်နဲ့ ရောမရောင်းနဲ့။
ကောင်းတဲ့အထဲကို မကောင်းတာ ရောမရောင်းနဲ့။
အဲဒီလိုလုပ်ရင်တော့ အပြစ်ရှိတယ်။ ဒါဟာ ခိုးတာပဲ။
ပြီးတော့ ဆီတို့ ဘာတို့ရောင်းရင် ပိဿာချိန်မပြည့်ဘူး။
ဒါလည်း ခိုးတာပဲ။ အဲဒါမျိုးတွေ လုပ်ပြီဆိုရင်တော့
“အဒိန္နာဒါန” မလွတ်ဘူးပေါ့။

မှန်မှန်ကန်ကန် ရောင်းဝယ်တာ သမ္မာအာဇီဝပဲ။ ရောင်းဝယ်စားသောက်တာ
မှန်ကန်တဲ့နည်းနဲ့ ရောင်းလို့ရတယ်။ မှန်မှန်ကန်ကန်ပြောပြီး ဟောဒီဟာ
မကောင်းဘူး၊ ဒါက ဈေးညံ့တယ်၊ ဟိုဘက်ကဟာက ကောင်းတယ်၊
ဟော ... မကောင်းတာ မကောင်းဘူးပြောလို့ရတယ်၊ အဲဒီလိုပြောပြီး
ရောင်းလို့ရတယ်။ မကောင်းတာဖြစ်လျက်နဲ့ ဒါလည်း
အတူတူပါပဲလို့ဆိုပြီးရောင်းရင် အပြစ်ရှိတာပေါ့။

အဲဒီတော့ အရောင်းအဝယ်လုပ်တဲ့နေရာမှာ ရိုးသားမှုလိုတယ်ပေါ့။
ရိုးရိုးသားသားနဲ့ စီးပွားရှာတယ်။ အမှန်အတိုင်း စီးပွားရှာတယ်။
အဲဒါအပြစ်မရှိပါဘူး။ ရိုးသားတယ်။ မရိုးသားဘူးဆိုတာ ဘယ်သူသိလဲ၊
ကိုယ်သိတာပေါ့၊ ကိုယ့်စိတ်ထဲက ရိုးသားတယ် မရိုးသားဘူးဆိုတာ သိတယ်။
 အေး ... ဒါကြောင့်မို့ “အဒိန္နာဒါန”ဆိုတာဟာ ခိုးမှ၊ လုမှ
“အဒိန္နာဒါန”မဟုတ်ဘူး။

အခုလို မမှန်မကန်တွေလုပ်တာမှန်သမျှ “အဒိန္နာဒါန”ထဲမှာပါတယ်။
အဲဒီကံအကျိုးပေးရင် ဘာဖြစ်တတ်လဲဆိုတော့ လုပ်သမျှတွေလွဲပြီး
ကိုယ့်ပစ္စည်းတွေ ခဏခဏဆုံးရှုံးတတ်တယ်။ မီးလောင်တဲ့အထဲပါတယ်၊ ရေမျောတဲ့အထဲပါတယ်၊ အခိုးခံရတယ် စသည်ဖြင့် ဒီအပျက်အစီးတွေ
ကံရဲ့ပုံရိပ်ထဲ ပေါ်လာတတ်တယ်။

အေး ... ဒါကြောင့်မို့လို့ လုပ်တဲ့အခါမှာလည်းပဲ အကျိုးရှိတဲ့အလုပ်ကို
လုပ်ရတယ်။ သူများမပေးတဲ့ပစ္စည်းဆိုရင် မယူဘူး၊ ပေးတာကိုပဲ ယူတယ်၊
သန့်ရှင်းတယ်၊ စင်ကြယ်တယ်ဆိုတဲ့စိတ်နဲ့ အရောင်းအဝယ်လုပ်ပြီးတော့
အသက်မွေးတယ်။ အပြစ်မရှိဘူး။ ကောင်းပြီ။

#ကာမေသုမိစ္ဆာစာရ နောက်တစ်ခုက ဘာလဲဆိုရင်
 “ကာမေသုမိစ္ဆာစာရ”၊ “ကာမေသုမိစ္ဆာစာရ” ဆိုတာ
ကာမကိစ္စနဲ့ပတ်သက်ပြီးတော့ မှားမှားယွင်းယွင်း လုပ်တာမျိုးပေါ့။

အဲဒီလို “ကာမေသုမိစ္ဆာစာရ”ကံမျိုးကို ကျူးလွန်မိပြီဆိုရင်
လူစဉ်မမီတဲ့ပုဂ္ဂိုလ်ဖြစ်တယ်။ အားလုံးက မုန်းတီးခံရတဲ့ ပုဂ္ဂိုလ်၊
အရပ်ထဲမှာဆိုရင် ချဉ်ဖတ်ပေါ့။ လူတကာအမြင်ကပ်ခံရတဲ့
ပုဂ္ဂိုလ်မျိုးဖြစ်တတ်တယ်။ အပါယ်ငရဲကျမယ်၊ သူလုပ်ရင်လုပ်သလောက် မကောင်းကျိုးပေးတာကို ခံရတယ်။
Eternal Light Magazine -April 2018